موضوع: نصائح هامة للراغبين في الزواج الإثنين يناير 28, 2008 9:10 am
أقدم لكم اليوم نصائح مهمة لكل اللي هايموت على نفسة و يتجوز . أولا العروسة • الوزن 50 كجم الحد الأقصى انا عارفك طفس بتحبها طويلة بيضاء رشيقة كل ده مش مهم كلها سنة واحدة بعد الجواز وكله حيبقى شبه كله اسود (حينسوا كريم فير اند لفلى ) وتخيين (انت ونصيبك وكل واحد على قد نيته) وقصير ( صدقنى حتى الطوال بعد الجواز بيقصروا حاجة ربانى يعنى) ولو مش مصدقنى اسأل اى حد متجوز بص له بس انت حتعرفه على طول حتلاقيه ماشى موطى فى الأرض و دمعة فى عينيه اديله منديل وخد رأيه وانا متأكد انه حينصحك : هات لفتين ثلاثة عشرين ثلاثين بكرة مناديل أكيد حتحتاجهم وكنتى فين يا لأ لما قلت انا آه – أوعى تعيط جنبه دورك فى العياط لسه ما جاش .
دقق قوى فى عيلتها واتأكد ان ما فيش واحد محامى يكون قاريبها –جارها- صاحب أخوها أحسن ولا مؤأخذة حتبقى فضيحتك بجلاجل وتلاقى نفسك مع أول مشكلة : مخلوع وتلاقى الناس فى الشارع بيشاوروا عليك وبيضحكوا وتلاقى ولادك بيتشتموا ويتقال لهم يا ولاد المخلوع
أبوها مهم جدا أبوها نصيحتى بلاش يكون موظف –قاعد فى البيت ليل نهار- والعملية مش ناقصة وطبعا بلاش رجال الأعمال انت مش ناقص اللى عنيهم زايغة على السكرتيرات واموال البنوك واوعى تفكر فى اللى مسافر بره حتبقى قرابيزك كلها مع حماتك –يا عينى عليك – وبلاش السباك والحانوتى والجزار والفرارجى - انت مش ناقص انفلونزا الطيور- وبلاش كمان يكون اعمال حرة او صاحب محل مباحث التموين مش سايبه حد فى حاله وبعدين انت حتخطب وللا حتجرى ورا ابوها فى الأقسام.
*أبوها : أزاى تعرف من أول مقابلة مع ابوها انه راجل كويس او لأ ؟؟ أول ما تقعد معاه وتطلب أيد بنته حيعمل حاجة من أثنين :-
الأولى : حيوطى على ايدك يبوسها ( وده معناه انه راجل محترم وعارف قيمة بنته ومصايبها وعارف قيمة العريس اللى جاى يخطب فى الزمن المهبب ده وعارف معنى ان واحدة حتغور من وشه بس خللى بالك احنا فى موسم الأوكازيونات احسن يطمع و يفاوضك تاخذ عروستين بدل واحدة ويعمل لك خصم على الثانية ) وممكن كمان يدعى لك ان ربنا يصبرك على ما سيبتليك به كما صبره هو على بلواه وسيظل يؤكد انه بيشترى راجل واللى عاوز يشترى يدفع وللا ايه ؟؟
الثاني : حيحط رجل على رجل ويقولك ايوه يا بنى انت قولتللى بتشتغل ايه ؟؟؟ وبعدين عشرين تلاتين سؤال وانت مغمن عليك وهنا سوف تكتشف سبب رائحة مخلل اللفت اللى انت شاممها من ساعة ما دخلت بيت العروسة !!!!!!! لأ لأ بالراحة كده وأعقل انا مش عاوزك ترد على طول – أفهم الأول- نسبة البنات الى الولاد فى مصر بقت 156 الى 134 يعنى لو كل الشباب اتجوزوا ودة مستحيل طبعا لأن لسه فى شباب عندهم عقل مش زى ناس !! وربنا يكملهم بعقلهم حيفضل 22 بنت من كل 156 من غير جواز فهمت . أتقل بقى. العرايس على قفا من يشيل ولا مواخذه انت قفاك حيستحمل ايه وللا ايه –وآآآآآه يا قفايا .
نصائح عامة لأول لقاء مع والدها : • بلاش نظام البدل وبلاش نظام جيل الشعر المعفن ده وبلاش كمان الجينز المقطع وبلاش حد من اهلك يروح معاك اول مرة خليها حلوة .كلمة من هنا وملاية تتفرش من هناك حتبقى سلطة وبعد اول زيارة مش حتقدر تغمض عينيك ( من الوجع طبعا) • بلاش نظام الشيكولاته الغالية والجاتوهات الفخمة اول زيارة – انا عارفك سخى وصريف( قال يعنى من جيبك مش من جيب ابوك)- خليهم تالت رابع زيارة ان كان فى. ماهو مش معقول نتشتم وندفع وللا انت رأيك ايه؟؟؟ • بلاش تشرب اى حاجة عندهم اول زيارة لأن ناس كتير كانت عاقلة وبعد ما شربت راحت شربت من كعانهم بقية عمرهم • بلاش نظام مكالمة صاحبك اللى انت مرتبها معاه وانت قاعد مع ابوها يتصل بيك ويقولك الف مبروك العملية ام نص مليون جنيه رست عليك –بقت قديمة دور على حاجة تانية- • لو ابو العروسة قام شوية ماتقلقشى حتلاقى قدامه شوية مواعيين عاوز يغسلهم او حتتين غسيل مستعجليين عليهم وطبعا لا داعى للأحراج عند عودته عندما تجد أثار الصابون على يده –كلنا لها
الرئيسية 
أحدث الصور 
التسجيل 
دخول 
